ऋतू

ऋतू येत होते ऋतू जात होते !
बहरणे फुलांच्या न भाग्यात होते !

इथे तेच जाणून होते यशाला ;
दिमाखात जे जे शिव्या खात होते !

अशा मोगलाईत जन्मास आलो
कलम घेतले की कलम हात होते !

तुझे साफ चुकलेत अंदाज वेड्या
इथे पावसाळे उन्हाळ्यात होते !

कसे बोचते सूख आताच त्यांना?
कधी ते सुखाने व्यथा गात होते !

कुणी चंद्र विश्वास तोडून जातो…
हसे चांदणीचे लिलावात होते…!

नको एवढा जीव लावू कुणाला
युगांचे दिवाळे क्षणार्धात होते !