जखम

कोरा कागद दिसला
की काहीतरी खरडणं होतं
जुन्याच जखमांना मग
नव्याने भरडणं होतं

झगडा

भस्म लावले अंगाला
अन फिरू लागलो उघडा
रोज पु्जिले जे देवाला
त्यास म्हणालो झगडा!

गुपीत

ही जी सगळी गुपीतं असतात ना
त्यांचही एक खास गुपीत असतं
दुसऱ्या कुण्णाला कळू द्यायचं नाही
म्हणताना सगळ्यांनाच सांगितलेलं असतं.

चंद्र

नारळीच्या जाळीतून
चंद्र किती नाजूक दिसतो!
पण तो दिसतो तसा नसतो
नेमक हेच समजायला मी फसतो!!

आयुष्य

दोन अधीक दोन उणे
सगळं करून पाहिलय
आयुष्याच गणित मात्र
अपुर्णांकात राहिलय

नाणं

एकाच नाण्याला दोन बाजू असतात
हे जर तुला कळलं असत
माझ्यापासून दूर जाणारं पाऊल
अखेर माझ्याकडेच वळलं असत